Салам НООРУЗ

2018-03-22 15:40:58 90

Чыгыш элдеринин жаңылануу майрамы болгон НООРУЗ майрамын эл аралык мамилелер факультети 2018-жылдын 19-март күнү белгиледи. Майрамдык иш-чарага ОшМУнун ректорат окүлдөрү, эл аралык мамилелер факультетинин жалпы жамааты, студент достор катышышты. Майрамдык иш-чаранын алкагында боз үй тигилип, сумөлөк жасалып, концерттик программалар берилип, улуттук спорт оюндары уюштурулду. Спорттук мелдештердин жана жылдын мыктыларына ардак грамота, дипломдор тапшырылды. Эл аралык мамилелер факультетинин деканы Эрлан Камалов жалпы катышуучуларды Жаңы-Жылы менен куттуктап, өзүнүн сөзүндө былтыркы жылга салыштырмалуу факультетибиздеги жылыштарды белгилеп кетти. “Былтыркы жылга салыштырып айта турган болсок, факультетибиз бир жыл ичинде төмөндөгү ийгиликтерге жетишти: - студенттерибиздин саны 312ден 545ке, тайпалардын саны 16дан 25ке, кафедралардын саны 2ден 3кө көбөйдү; - жаңы “Чыгыш таануу, африканистика” билим берүү программасы ачылды жана 42 студент (2 тайпа) бул программа менен окууда; - орто кесиптүү билим берүүчү “Котормо иши” адистиги ачылып, азыркы учурда 56 студент (3 тайпа) ушул адистик боюнча билим алууда; - алыскы жана жакынкы чет өлкөлөрдүн, мекенибиздин алдыңкы университеттери менен мамилелер жогорку деңгээлге көтөрүлүп, академиалык мобильдүүлүк боюнча ОшМУда 1-орунга чыктык; - билим берүү ишмердигинин ачык – айкындыгын камсыз кылуу жана студенттердин, окутуучулардын эмгегин стимулдаштыруу максатында студенттерибиздин, магистранттарыбыздын жана окутуучуларыбыздын рейтинги ачык жарыялана баштады; - студенттерибиз, магистранттарыбыз жана окутуучуларыбыз шаардык, облустук, республикалык жана эл аралык деңгээлдеги илимий, билим берүү, маданий – массалык иш – чараларга активдүү катышып, ийгиликтерди жаратышты; - дүйнөнүн, өлкөбүздүн алдыңкы окуу жайлары, эл аралык уюмдар менен биргеликте эл аралык мамилелердин актуалдуу проблемалары боюнча 7 жолу онлайн режиминде тегерек столдорду, талкууларды, илимий-практикалык конференцияларды телемост форматында өткөрүүгө жетиштик; - кызыктар тараптан (стейкхолдерлер) болгон ата-энелер, бүтүрүүчүлөр, жумуш берүүчүлөр менен байланышты бекемдөө максатындагы иш-чаралар тынымсыз өткөрүлүүдө жана алардын сунуштары окуу процессинде колдонула баштады; - ОшМУнун профилакториясында ден-соолугун чыңдаган студенттердин саны кескин өсүп, студенттердин ар тараптуу өсүшүн камсыз кылган дискуссиялык клубдарынын ишин, семинар – тренингдерди, акысыз тил курстарын, ийгиликтүү инсандар менен жолугушууларды эффективдүү уюштуруу салтка айланууда. Жакында: - заманбап технология менен курулган жаңы окуу корпусуна кирүү алдында турабыз; - орто кесиптик билим берүүчү “Котормо иши” адистиги аккредитациялык талаптарды аткаргандыгына байланыштуу көз карандысыз аккредитациядан өткөндүгү жөнүндөгү чечимди күтүүдөбүз; - “Аймак таануу” жана “Саясат таануу” магистратура билим берүү программалары көз карандысыз аккредитациядан өтүүгө активдуу даярданууда”- деген сөздөрдөн кийин былтыркы жыл Эл аралык мамилелер факультети үчүн абдан жемиштүү жыл болгонуна кубанып, жаңы-жылга чоң максат пландар менен аттандык.